Deall rôl gwirfoddoli mewn gofal cymdeithasol

Rydyn ni’n gyffrous i gyhoeddi astudiaeth ymchwil newydd a gafodd ei gomisiynu gan Ofal Cymdeithasol Cymru i ddeall sut mae gwirfoddoli'n cyfrannu at ofal cymdeithasol. Mae'r ymchwil yn cael ei ariannu gan Lywodraeth Cymru drwy Grant Strategol Gwirfoddoli Cymru, sydd yn cael ei weinyddu gan Gyngor Gweithredu Gwirfoddol Cymru (CGGC).

Bydd yr astudiaeth yn gorffen yn gynnar yn 2025 a byddwn ni'n gweithio gyda Prifysgol De Cymru, Sefydliad Iechyd a Gofal Cymdeithasol Cymru a Chanolfan Effeithiolrwydd Elusennau yn Ysgol Fusnes Bayes.

Gyda'i gilydd, mae’r tri partner yn darparu ystod eang o sgiliau a phrofiad gwerthfawr mewn ymchwil, ymgysylltu ac arweinyddiaeth gwirfoddolwyr.

Rydyn ni’n gwneud y gwaith hwn fel rhan o ymrwymiad sy’n cael ei nodi yn ein strategaeth gweithlu iechyd a gofal cymdeithasol, sy'n galw am well dealltwriaeth o wirfoddoli mewn gofal cymdeithasol.

Trwy'r astudiaeth ymchwil hon, byddwn yn dysgu mwy am y manteision a'r cyfleoedd sy’n cael eu creu trwy wirfoddoli. Gallwn hefyd gael gwell dealltwriaeth o heriau gwirfoddoli a gweithio gyda gwirfoddolwyr mewn gofal cymdeithasol, yn enwedig mewn lleoliadau gofal preswyl i oedolion yng Nghymru.

Gall canfyddiadau'r ymchwil ddylanwadu ar y math o gefnogaeth sy’n cael ei rhoi ar waith ar gyfer gwirfoddoli. A gallwn ddefnyddio'r hyn a ddysgwn i hyrwyddo a datblygu model cynaliadwy a chadarnhaol sy'n cydnabod arfer da sydd eisoes yn bodoli a chyfraniad gwerthfawr gwirfoddoli o fewn y sector.