Porth data gofal cymdeithasol cenedlaethol Cymru

Beth yw'r porth data?

Wedi'i ddatblygu gan Gofal Cymdeithasol Cymru, mae'n siop un stop ar gyfer data am ofal cymdeithasol yng Nghymru. 

Y nod yw dwyn ynghyd ystod o ddata am y rhai sy'n gweithio ym maes gofal cymdeithasol a'r rhai sydd angen gofal cymdeithasol, yn ogystal â ffactorau eraill a allai effeithio ar y galw am ofal cymdeithasol. 

Er enghraifft, mae'r porth yn cynnwys data am  bobl sydd wedi cofrestru fel gweithwyr gofal cymdeithasol yng Nghymru, nifer y plant sy'n derbyn gofal, faint o arian y mae cynghorau'n ei wario ar wasanaethau, a nifer y bobl sydd wedi cael diagnosis o ddementia.  

Pwy yw e ar gyfer?

Mae’r porth ar gyfer unrhyw un sydd eisiau archwilio data am ofal cymdeithasol yng Nghymru. 

Gall hyn gynnwys dadansoddwyr lleol sydd eisiau dod o hyd i ddata am eu hardal yn gyflym a’i rannu ag eraill, neu arweinwyr gwasanaeth a chomisiynwyr sydd eisiau cael mynediad at ystod eang o ffynonellau data mewn un lle. 

Bydd yn ddefnyddiol i bobl sydd eisiau deall sut mae eu hardal leol yn cymharu ag eraill, neu’r rhai sy’n chwilio am wybodaeth benodol am y gweithlu neu blant sy’n derbyn gofal. 

Mae hefyd ar gyfer y rhai sydd eisiau archwilio’r data’n weledol, drwy nodweddion fel graffiau llinell neu fapiau. 

Pa ddata sydd yn y porth?

Mae’r data yn dod o amrywiaeth o ffynonellau. Mae llawer ohono’n dod gan Lywodraeth Cymru drwy Stats Cymru. 

Mae data arall yn dod gan Gofal Cymdeithasol Cymru ei hun, yn ogystal â sefydliadau fel Arolygiaeth Gofal Cymru (gwybodaeth am wasanaethau cofrestredig a’r lleoedd maen nhw’n eu cynnig), y Swyddfa Ystadegau Gwladol (gwybodaeth am fywydau pobl yng Nghymru), a Iechyd Cyhoeddus Cymru. 

Yn ogystal â’r data gan y darparwyr hyn, mae’r porth hefyd yn cynnwys data wedi’i drawsnewid i’ch helpu i gael mwy o fewnwelediadau i’r ffigurau. Gall data wedi’i drawsnewid olygu dangos dadansoddiadau fel canrannau neu roi cyfraddau i chi gymharu. 

Er enghraifft, efallai y byddwch eisiau gwybod faint o asesiadau o oedolion sydd efallai angen gofal sy’n arwain at gynlluniau gofal a chymorth, a faint mae hynny’n amrywio rhwng awdurdodau lleol gwahanol. Efallai y byddwch eisiau gwybod nifer y lleoedd mewn cartrefi gofal fesul 10,000 o bobl sy’n byw mewn ardal. Neu faint mae cynghorau’n gwario ar wasanaethau fesul pen o’r boblogaeth. 

Beth allwch chi ei wneud ar y porth?

Gallwch ryngweithio â’r data mewn gwahanol ffyrdd, fel gweld y data fel tabl neu archwilio delweddaethau. Rydym hefyd yn cyhoeddi crynodebau data sy’n rhoi mewnwelediadau am y pynciau data sydd yn y porth, yn ogystal â rhagamcanion data ar gyfer cynllunio. 

Gallwch hefyd: 

• chwilio am ddata neu bori yn ôl categori
• hidlo data yn ôl awdurdod lleol neu fwrdd iechyd
• gweld y data ar gyfer gwahanol ystodau dyddiad
• rhannu data ag eraill
• lawrlwytho’r data fel taenlen.

Crynodebau data

Mae ein crynodebau data yn eich helpu i wneud penderfyniadau gwybodus yn seiliedig ar ddata go iawn. 

Mae’r crynodebau hyn yn dod â data at ei gilydd o ystod o ffynonellau ar bwnc penodol. 

Mae ein crynodebau data yn cynnwys: 

• Sut mae pobl yn teimlo am ofal cymdeithasol yng Nghymru?
• Ydy gofalwyr di-dâl Cymru yn colli cyfle i gael cymorth?
• Plant yng Nghymru mewn perygl o ddioddef camfanteisio
• Gwerth economaidd gofal cymdeithasol i oedolion yng Nghymru

Dywedwch eich barn

Oes gennych chi unrhyw syniadau, adborth neu gwestiynau am y porth data? Neu hoffech chi awgrymu pynciau y gellid eu cynnwys yn y crynodebau data? 
E-bostiwch data@gofalcymdeithasol.cymru