Mae galw cynyddol a mwy o gystadleuaeth am arian yn golygu ei bod yn bwysicach nag erioed i allu dangos effaith eich gwaith caled.
Ond nid yw gwerthuso yn ymwneud ag atebolrwydd yn unig, dylai hefyd eich helpu i ddysgu, addasu a gwella eich gwasanaeth.
Er mwyn helpu i ddangos eich effaith a myfyrio ar eich dysgu, rydyn ni wedi cyflogi arbenigwr gwerthuso yn benodol i’ch cefnogi gyda phob agwedd o werthuso.
Does dim ots beth yw eich maes gwaith, gallwn eich cefnogi i gynnal gwerthusiadau effeithiol sy’n dangos effaith eich gwaith ac yn dangos y gwahaniaeth rydych chi'n ei wneud i fywydau pobl.
Pam mae gwerthuso'n bwysig?
Mae gwerthuso effeithiol yn ein helpu i fesur effaith gwasanaeth neu ymyriad ac yn darparu tystiolaeth o'r newidiadau cadarnhaol yr ydych chi'n eu gwneud i fywydau pobl.
Gall hefyd ein helpu i ddysgu, trwy archwilio beth sy'n gweithio'n dda, beth sydd angen ei newid a beth sy'n wirioneddol bwysig i bobl sy'n defnyddio'ch gwasanaeth.
Mae gwerthuso'n bwysig ar gyfer atebolrwydd, tryloywder a dysgu, a gall helpu i gyfiawnhau penderfyniadau am gyllid ac adnoddau.
Ein cefnogaeth gwerthuso
Gallwn eich cefnogi ym mhob agwedd ar werthuso. Gallai hyn olygu eich helpu i ddeall y broses, eich cefnogi i adnabod y newidiadau yr ydych chi'n ceisio eu gwneud, neu archwilio pa ddulliau gwerthuso sydd orau i chi.
Rydyn ni'n datblygu pecyn cymorth i bobl sy’n gweithio ym maes gofal cymdeithasol sydd am ddim ac yn agored i bawb. Mae'n cynnwys:
- cyfres o sesiynau hyfforddi ar-lein hygyrch i ‘ddad-dirgelu’ gwerthuso
- cymorth gwerthuso un-i-un wedi'i deilwra ar gyfer pobl sy'n gweithio ym maes gofal cymdeithasol.
Rydyn ni hefyd yn gweithio ar greu:
- fideos hyfforddi gwerthuso byr a bachog i gefnogi gweithwyr gofal cymdeithasol rheng flaen
- adnoddau ac offer sy'n cefnogi pobl sy'n gweithio ym maes gofal cymdeithasol i gynnal gwerthusiadau.
Sesiynau hyfforddi ar-lein
Ar y cyd â’n cydweithwyr yn DEEP rydyn ni wedi rhoi nifer o sesiynau at ei gilydd i helpu i ‘ddad-dirgelu’ gwerthuso a rhoi’r hyder i chi gynnal neu gomisiynu gwerthusiadau eich hun.
Mae ein hyfforddiant gwerthuso ar gyfer unrhyw un sy'n gweithio ym maes gofal cymdeithasol ond mae'n ddelfrydol ar gyfer unigolion sy'n ymwneud â meysydd fel rheoli prosiectau, perfformiad a gwelliant, ymchwil a datblygu, effaith a chyllid.
Mae pum sesiwn hyfforddi ym mhob cyfres.
- Dad-dirgelu gwerthuso: cyflwyniad.
- Defnyddio ‘stori newid’ i fesur effaith.
- Moeseg a gwerthuso.
- Cyflwyniad i werthuso economaidd.
- Creadigrwydd a chyfranogiad mewn gwerthuso.
Archebwch eich lle
Os oes gennych ddiddordeb mewn cymryd rhan yn ein sesiynau hyfforddi, gallwch archebu drwy'r linc Eventbrite.
Sylwch fod lleoedd yn gyfyngedig felly mae'n well archebu cyn gynted â phosibl i sicrhau eich lle.
Os na allwch fynychu ein sesiynau diweddaraf, byddwn ni'n cynnal yr hyfforddiant ddwywaith y flwyddyn ac yn newid yr amser a'r dydd i geisio ateb anghenion pawb.
Byddwn ni'n diweddaru’r dudalen hon gyda gwybodaeth newydd a dyddiadau hyfforddi wrth iddyn nhw ddod ar gael.
Cefnogaeth un i un ar gyfer eich cwestiynau gwerthuso
Rydyn ni hefyd yn cynnig cymorth un i un gydol y flwyddyn i helpu unigolion sy’n gweithio ym maes gofal cymdeithasol i oresgyn heriau penodol yn ymwneud â gwerthuso.
Nid oes angen i chi fynychu un o’n sesiynau hyfforddi i gael mynediad at y cymorth hwn a byddwn ni'n gwneud ein gorau i helpu gyda pha bynnag her yr ydych chi'n ei hwynebu.
Mae’r cymorth hwn ar gael i unrhyw un sy'n gweithio ym maes gofal cymdeithasol sydd eisiau cymorth i ddatblygu, cynnal neu ddysgu am werthusiadau. Am ragor o wybodaeth am y gefnogaeth hon, anfonwch neges at ein Uwch arweinydd gwerthuso.
