Ydych chi’n ymarferydd gofal cymdeithasol, yn rheolwr, yn gomisiynydd, yn ddarparwr gofal, yn gweithio yn y trydydd sector neu’n ymwneud ag ymchwil gofal cymdeithasol? Gallwn ni eich helpu i wneud penderfyniadau sy’n cael eu cyfoethogi gan dystiolaeth.
Rydyn ni’n cefnogi ymarfer drwy wneud y canlynol:
- rhannu gwybodaeth sy’n ddefnyddiol ac yn berthnasol
- cyflwyno ymchwil a thystiolaeth gallwch chi eu defnyddio yn eich ymarfer
- cynnig cyfleoedd i roi sgiliau ymchwil ar waith a defnyddio tystiolaeth.
Sut gallwn ni eich cefnogi?
Yn yr adran hon fe welwch chi wybodaeth am sesiynau a fydd yn gallu eich helpu chi i ddefnyddio gwybodaeth wrth ymarfer.
Mae’r sesiynau’n agored i bawb a’u nod yw:
- sicrhau bod gwybodaeth yn hygyrch ac yn ddiddorol
- helpu chi i fagu hyder wrth ddefnyddio ymchwil mewn ymarfer
- rhoi sylw i bynciau y mae ymarferwyr yn dweud y maen nhw eisiau gwybod mwy amdanynt.
Myfyrio ar dystiolaeth
Mae’r sesiynau hyn wedi’u cynllunio ar gyfer ymarferwyr gan aelodau o’n tîm sydd â phrofiad o ymarfer.
Mae’r fformat yn syml. Rydyn ni’n trafod darn o ymchwil neu grynodeb tystiolaeth. Mae'n hawdd addasu’r dull i’w ddefnyddio’n ymarferol a gallwn ni ddarparu cymorth gyda hynny hefyd.
Cymuned ymholi
Rydyn ni’n hwyluso’r sesiynau hyn mewn partneriaeth â chyd-weithwyr o’r tîm Datblygu Ymarfer a Gyfoethogir gan Dystiolaeth (DEEP). Mae ymchwilwyr yn darparu sbardun cychwynnol y gall cyfranogwyr wedyn ei archwilio a'i drafod.
“Bendant wedi fy annog i feddwl yn ddyfnach a meddwl am syniadau ar y cyd.” - Cyfranogwr, sesiwn Cymuned Ymholi
Sgyrsiau ymchwil
Rydyn ni’n gwahodd ymchwilydd academaidd i gyflwyno pwnc ymchwil. Wedyn mae cyfle i gyfranogwyr ryngweithio a myfyrio ar yr hyn y maen nhw wedi’i ddysgu.
Sgiliau ymchwil
Rydyn ni wedi datblygu cyfres o weithdai sy'n helpu pobl i ddefnyddio ymchwil a thystiolaeth mewn ymarfer.
Mae’r sesiynau hyn yn rhoi cyflwyniad i sgiliau ymchwil sylfaenol, cael gafael ar ymchwil, deall gwahanol fathau o ymchwil, a sut i'w defnyddio mewn ymarfer. Gall pobl ddod i bob sesiwn yn ei thro, neu ymuno â sesiynau unigol, yn dibynnu ar eu hanghenion.
Gallwn ni hefyd gefnogi’r defnydd o dystiolaeth mewn meysydd penodol sydd o ddiddordeb, neu faterion ymarfer penodol.
Cymorth wedi’i deilwra
Gallwn ni hefyd gynnig cymorth mwy pwrpasol i’ch tîm neu sefydliad ar draws ystod o bynciau sy’n ymwneud â gofal cymdeithasol. Ein nod yw ymateb i anghenion ymarfer ac anghenion eich tîm neu eich sefydliad. Mae hyn yn golygu meddwl am ffyrdd newydd a chreadigol o rannu gwybodaeth.
Sioeau teithiol ymchwil
Nod ein sioeau teithiol ymchwil yw hyrwyddo gwerth ymchwil a rhannu sut mae’n gallu bod yn berthnasol i ymarfer gofal cymdeithasol.
Rydyn ni’n mynd yn uniongyrchol at awdurdodau lleol ledled Cymru, er mwyn lleihau costau a chynyddu amser.
Ein dull gweithredu
Rydyn ni’n dod â nifer fach o ymarferwyr ac ymchwilwyr dethol at ei gilydd i ddarparu sesiynau byr, rhyngweithiol ac ymarferol sy’n:
- rhoi cyfle i ymarferwyr gysylltu ag ymchwilwyr ynghylch pynciau penodol
- cynyddu gwybodaeth ac ymwybyddiaeth o ymchwil sy’n cael ei gynnal yng Nghymru
- creu lle i fyfyrio ar sut i roi gwybodaeth ymchwil ar waith mewn ymarfer.
“Sesiwn llawn ysbrydoliaeth. Da gweld sut mae modd defnyddio ymchwil mewn ymarfer.” - Cyfranogwr, Sioe deithiol ymchwil
Ein tîm symudedd gwybodaeth
Er ein bod ni’n defnyddio’r term ‘symudedd gwybodaeth’ i ddisgrifio ein tîm, mae ein cynnig wedi cael ei ddatblygu gan bobl â phrofiad ymarfer sy’n ‘defnyddio gwybodaeth wrth ymarfer’. Er y bydd pobl yn defnyddio termau gwahanol o bosib, mae'r gwaith ei hun yn seiliedig ar ddull perthynas. Yn ei hanfod, mae'n golygu ymgysylltu ystyrlon, cyfranogiad y defnyddiwr a gweithio tuag at ddefnyddio tystiolaeth i gael effaith.
Rydyn ni’n cysylltu ymchwil academaidd â phobl sy'n gwneud penderfyniadau tu fas i'r byd academaidd, gan gynnwys pobl sy'n ymwneud â pholisi cyhoeddus ac ymarfer proffesiynol. Yn ogystal ag ymchwil academaidd, mae rhannu gwybodaeth yn cynnwys tystiolaeth sy'n seiliedig ar ymarfer hefyd. Mae hyn yn golygu defnyddio tystiolaeth gan bobl sy’n darparu ac yn defnyddio gwasanaethau, eu gofalwyr a’u rhwydwaith cymorth ehangach.
Mae symudedd gwybodaeth yn golygu defnyddio gwybodaeth wrth ymarfer: gan wneud tystiolaeth yn hygyrch, yn glir ac yn ddefnyddiol i'r rhai sydd ei hangen
Sut gall symudedd gwybodaeth eich helpu yn eich ymarfer?
Mae’r dull yn gallu helpu i wneud y canlynol:
- dod â phobl ynghyd
- archwilio a defnyddio tystiolaeth mewn ffyrdd creadigol a chynhwysol
- cefnogi gweithio amlddisgyblaethol
- mynd i’r afael â heriau ymarfer a dylanwadu ar newid
- gwella canlyniadau i bobl sy’n defnyddio gwasanaethau gofal a chymorth.
Dewch o hyd i fwy o wybodaeth!
Symudedd gwybodaeth:
Sioeau teithiol ymchwil:
Fframwaith Perfformiad a Gwella ar gyfer Gwasanaethau Cymdeithasol:
