Cefnogaeth ar gyfer ymchwilwyr

Rydyn ni am gefnogi'r diwylliant cyfoethog o ymchwil gofal cymdeithasol sydd gennym ni yng Nghymru.

Rydyn ni'n cefnogi ymchwilwyr mewn sawl ffordd, drwy gefnogi ddyluniad cynllun ymchwil, cais am gyllid neu gymorth i rannu canfyddiadau ymchwil.

Rydyn ni hefyd yn cefnogi ymarferwyr gofal cymdeithasol i gynnal ymchwil a defnyddio gwybodaeth wrth ymarfer.

Rhannu syniadau a blaenoriaethau ymchwil

Rydyn ni'n cydweithio gyda phobl sy'n defnyddio a darparu gofal cymdeithasol er mwyn nodi pynciau ymchwil i'w blaenoriaethu. Rydyn ni'n rhannu'r blaenoriaethau hyn gydag ymchwilwyr a chyllidwyr i annog ymchwil newydd.

Os ydych chi'n chwilio am syniad prosiect ymchwil, gallwch ddod o hyd i fwy o wybodaeth ar ein tudalen Gosod blaenoriaethau ymchwil.

Cefnogaeth dylunio ymchwil

Rydyn ni'n cefnogi pobl i ddylunio ymchwil sy'n cwrdd ag anghenion y sector. Mae hyn yn golygu rhoi cyngor, canllawiau a rhannu ein profiad o'r sector drwy fynychu grwpiau cynghori neu lywio.

Mewn partneriaeth gyda'n cydweithwyr yn Datblygu Ymarfer a Gyfoethogir gan Dystiolaeth (DEEP) rydym yn gallu archwilio dyluniad eich astudiaeth drwy ddulliau ar ffurf perthynas fel 'y newid mwyaf arwyddocaol' (MSC) ac ymholiad gwerthfawrogol.

Cefnogaeth i geisiadau cyllid ymchwil

Rydyn ni'n cynnig cefnogaeth sy'n eich helpu i ddatblygu eich cais am gyllid. Mae hyn yn cynnwys cymorth ymarferol a dangos ein cefnogaeth yn gyhoeddus ar gamau allweddol o'r broses gwneud cais.

Mae'n bosib i ni gynnig llythyr cefnogaeth ar bwnc neu gwestiwn ymchwil sy'n bwysig i ofal cymdeithasol yng Nghymru. Neu gynnig cadarnhad ein bod yn ymwneud â gweithgareddau prosiect arbennig.

Cysylltu ag ymarferwyr ac academyddion am eich ymchwil

Gall ein Rheolwr Partneriaethau Ymchwil a'n Rheolwr Cymuned Dystiolaeth helpu i gysylltu ymchwilwyr ac ymarferwyr, awdurdodau lleol a sefydliadau eraill sydd â diddordeb mewn cefnogi ymchwil gofal cymdeithasol.

Rydyn ni'n gallu hyrwyddo ymchwil sydd wedi derbyn cymeradwyaeth drwy ein cymunedau ymarfer a sianeli eraill. Ac rydyn ni'n cefnogi cyfranogiad drwy wahodd gweithwyr cofrestredig ac eraill i gymryd rhan mewn ymchwil.

Mae'r Gymuned Dystiolaeth yn dwyn ynghyd ymarferwyr, ymchwilwyr a phobl â phrofiad byw. Drwy ymuno gallwch chi:

drafod a rhannu gyda phobl eraill sy'n teimlo'n angerddol am ymchwil gyfoes ar bynciau arbennig a helpu rhoi'r canfyddiadau ar waith mewn ymarfer
cysylltu ag aelodau eraill i gyd-gynhyrchu cynigion ymchwil
mynychu a chyflwyno gweithdai a digwyddiadau, fel sgyrsiau ymchwil, cymunedau ymholi neu'n sesiynau myfyrio ar ymchwil.

Creu effaith

Mae cyfrannu blog yn ffordd dda o sicrhau ymwybyddiaeth o'ch gwaith ymchwil ymhlith pobl sy'n gweithio yn y sector.

P'un ai megis cychwyn ar brosiect newydd, neu'n awyddus i rannu canfyddiadau sy'n gallu llywio ymarfer, mae croeso i chi gysylltu â ni.

Er mwyn hyrwyddo ymchwil berthnasol ledled Cymru, rydyn ni hefyd yn rhannu gwybodaeth am y prosiectau yr ydym yn eu cefnogi ar ein Porwr prosiectau.

Mae'r Fframwaith Cymorth ac Ymgysylltu Ymchwil yn disgrifio ein cefnogaeth ffurfiol ac yn cynnwys y meini prawf rydyn ni'n eu defnyddio i wneud penderfyniadau.

Cysylltiadau allweddol

Dr Eleanor Johnson

Pennaeth Ymchwil

Rwy'n rheoli ein tîm ymchwil.

Rydyn ni'n annog ac yn hyrwyddo ymchwil o ansawdd da ar ofal cymdeithasol yng Nghymru ac yn berthnasol i Gymru drwy osod blaenoriaethau ymchwil a chefnogi ymchwilwyr.

Rydyn ni'n casglu ynghyd canfyddiadau ymchwil i ddarparu mewnwelediadau i bobl sy’n gweithio ym maes gofal cymdeithasol drwy grynodebau tystiolaeth a'r gyfres cipolwg ar y gweithlu.

Cyn ymuno â Gofal Cymdeithasol Cymru roeddwn yn Gymrawd Ymchwil yng Nghanolfan Ymchwil Iechyd a Gofal Cymdeithasol ym Mhrifysgol Bryste. Mae fy ngwaith ymchwil yn ffocysu ar waith gofal â thal, tai a gofal a gwirfoddolwyr gofal cymdeithasol. Roeddwn i hefyd yn dysgu dulliau ymchwil a chymdeithaseg. Yn ddiweddarach, fe wnes i ymchwil wedi ei ariannu gan yr NIHR, Ysgol Ymchwil Gofal Cymdeithasol ar sut wnaeth y pandemig effeithio ar y berthynas rhwng gweithwyr gofal a phobl sy'n defnyddio gofal. Mae fy ngwaith ymchwil PhD, Prifysgol Caerdydd (2018), yn cymharu profiadau gweithwyr gofal a darpariaeth gofal mewn cartrefi preswyl cost uchel a chost isel i bobl hŷn. Bues i'n gweithio fel gweithiwr gofal mewn cartrefi preswyl i bobl hŷn cyn, ac yn ystod, fy noethuriaeth.

Dr Kate Howson

Rheolwr Partneriaethau Ymchwil

Fel arweinydd ar gyfer partneriaethau ymchwil, fy mhrif nod yw chwilio, adeiladu a chynnal perthnasoedd a gweithgareddau sy'n cefnogi'r defnydd o ymchwil mewn ymarfer a pholisi mewn gofal cymdeithasol. Rwy'n gweithio'n agos gydag ymchwilwyr, sefydliadau ymchwil ac ymarferwyr ledled Cymru i helpu i gefnogi'r gwaith o weithredu ymchwil cyfredol.

Rwy'n helpu i sicrhau bod ymarfer yn cael ei gyfoethogi gan ymchwil a thystiolaeth, a bod ymchwil yn ymateb i anghenion y rhai sy'n defnyddio gofal cymdeithasol. Rwy'n nodi meysydd ar gyfer cydweithredu rhwng sefydliadau, i ddarparu cyfleoedd adeiladu sgiliau ymchwil i ymarferwyr allu cynnal eu hymchwil eu hunain yn ymarferol.