Rydyn ni'n credu y bydd creu mannau i gysylltu a datblygu perthnasoedd yn arwain at newid parhaol a chadarnhaol.
Mae ein cymunedau yn dod ag ymarferwyr gofal cymdeithasol, arloeswyr a phobl sydd â phrofiad byw ynghyd i greu'r egni a'r momentwm ar gyfer newid.
Maen nhw’n fannau i bobl rannu eu gwybodaeth a’u syniadau ac i ddysgu gan eraill, gan greu perthnasoedd ar draws gwahanol sectorau ledled Cymru.
Mae'r cymunedau'n cyfarfod ar-lein a mewn person, tra gall aelodau hefyd gysylltu trwy blatfform ar-lein.
Yma, mae’r Grŵp Gwybodaeth yn cyflwyno rhai o uchafbwyntiau’r hyn sydd wedi bod yn digwydd yn ein cymunedau ers dechrau'r flwyddyn.
Lansio gwasanaeth cymorth newydd
Ym mis Mawrth fe wnaethon ni lansio ein gwasanaeth cymorth a datblygiad cymunedau ymarfer newydd.
Mae rheolwyr ein cymunedau eisiau rhannu eu gwybodaeth a'u profiad gydag eraill sy'n meddwl y gallai dod â phobl at ei gilydd eu helpu i fynd i'r afael â heriau gofal cymdeithasol.
Dyna pam rydyn ni wedi creu'r gwasanaeth hwn, i gefnogi pobl a allai elwa o ddefnyddio dull cymunedol. Mae'r gwasanaeth yn agored i bobl sydd â diddordeb mewn archwilio dull cymunedol a'r rhai sydd eisoes wedi dechrau dod â phobl at ei gilydd.
Trwy gynnig y gefnogaeth hon, rydyn ni'n anelu at helpu i sicrhau bod cymunedau'n cael eu cynllunio a'u rhedeg mewn ffordd sy'n rhoi'r cyfle gorau iddyn nhw i gyflawni eu nodau.
I ddarganfod mwy am y gwasanaeth, os ydych chi'n gymwys a sut i wneud cais, ewch i'n tudalen gwasanaeth cymorth a datblygu cymunedau ymarfer. Neu cofrestrwch i ymuno â'n sesiwn wybodaeth nesaf.
Cymuned Dystiolaeth
Rhwng Ionawr a Mawrth, daeth y Gymuned Dystiolaeth at ei gilydd ar gyfer tair sesiwn Myfyrio ar Dystiolaeth. Edrychodd y sesiynau ar wahanol erthyglau cyfnodolion ar themâu chwilfrydedd proffesiynol, salwch ffug neu achosedig, ac archwilio a yw'n foesegol dweud celwyddau wrth bobl â dementia.
Cafodd cymuned ymholi ei chynnal ar bwnc anhwylder sbectrwm alcohol y ffetws. Hwyluswyd hyn gan Nick Andrews o Ddatblygu Ymarfer a Gyfoethogir gan Dystiolaeth (DEEP) a Rebecca Govan o Brifysgol Dinas Birmingham.
Cynhaliodd y gymuned ei chyfarfod grŵp craidd chwarterol hefyd. Mae grŵp craidd y Gymuned Dystiolaeth yn agored i unrhyw un sydd eisiau cael mwy o lais yn y cyfeiriad y mae'r gymuned yn ei gymryd. Os hoffech ddod yn aelod o'r grŵp hwn, cysylltwch â rhiannon.wright@gofalcymdeithasol.cymru.
Cafodd sawl blog newydd eu cyhoeddi ar blatfform ar-lein y gymuned. Roedd y themâu yn cynnwys dathlu gwaith cymdeithasol gyda phobl hŷn, ymarfer gwrth-hiliol, goruchwyliaeth mewn gwaith cymdeithasol plant a theuluoedd, dulliau sy'n seiliedig ar gryfderau mewn gofal cymdeithasol i oedolion, a chyfathrebu ar ddiwedd oes.
Cafodd erthyglau newyddion eu rhannu am ganllawiau ymarfer newydd ar gyfer ymgorffori tystiolaeth mewn gofal cymdeithasol plant, ymchwil diweddar ar awtistiaeth a rhieni, a chanllawiau newydd sy'n seiliedig ar dystiolaeth ar y pwnc rhianta trwy adfyd.
Ymunwch â'r Gymuned Dystiolaeth
