Crynodeb dyfais botensial ddigidol: Arweinyddiaeth a strategaeth ddigidol
Ym mis Gorffennaf 2025, cyhoeddon ni adroddiad am aeddfedrwydd a llythrennedd digidol gofal cymdeithasol yng Nghymru.
Roedd yr adroddiad yn cynnwys canfyddiadau cynnar ein ddyfais botensial ddigidol ac roedd yn seiliedig ar ymatebion 1,200 o bobl o 295 sefydliad rhwng Ionawr a Mawrth 2025.
Dyma grynodeb o ganfyddiadau ac argymhellion yr adroddiad ar bwnc arweinyddiaeth a strategaeth ddigidol.
Cryfderau
- Hyrwyddo digidol: Mae 81 y cant o staff yn dweud bod arweinwyr yn hyrwyddo digidol.
- Strategaeth ddigidol: Mae 69 y cant yn dweud bod digidol yn rhan o strategaeth eu sefydliad.
- Arweinyddiaeth ddigidol: Mae 71 y cant o uwch arweinwyr yn teimlo bod ganddynt sgiliau arweinyddiaeth ddigidol.
- Diogelu data a seiberddiogelwch: Mae 74 y cant o sefydliadau yn trafod diogelu data a seiberddiogelwch yn rheolaidd.
Meysydd i'w datblygu
- Buddsoddi mewn cynnal a chadw technoleg: Dim ond 14 y cant o sefydliadau sy'n buddsoddi 'bob amser' mewn cynnal a chadw technoleg, gan ostwng i ddim ond tri y cant ymhlith awdurdodau lleol.
- Technolegau sy'n dod i'r amlwg: Anaml y mae 33 y cant o arweinwyr awdurdodau lleol yn ymgysylltu â thechnolegau sy'n dod i'r amlwg.
- Ymwybyddiaeth staff o safiad digidol: Mae 11 y cant o staff yn ansicr am safiad digidol eu harweinyddiaeth.
- Hyder i gyflawni prosiectau digidol: Dim ond 53 y cant o staff sy'n teimlo'n hyderus wrth gyflawni prosiectau digidol.
Mae arweinwyr preifat a thrydydd sector yn adrodd mwy o hyder mewn arwain newid digidol a chynllunio strategol cliriach.
Mae arweinwyr awdurdodau lleol yn aml yn wynebu mwy o gyfyngiadau, fel cyllid, caffael a llywodraethu, a all gyfyngu ar eu gallu i arwain trawsnewid digidol.
Cymariaethau allweddol
Mae ein hymchwil wedi datgelu rhai gwahaniaethau nodedig rhwng ymatebion staff awdurdodau lleol a'r rhai sy'n gweithio yn y sector preifat neu'r trydydd sector.
- Hyder mewn arwain newid digidol: Dywedodd 25 y cant o ymatebwyr awdurdodau lleol eu bod yn anaml neu byth yn teimlo'n hyderus yn arwain newid digidol, o'i gymharu â dim ond 10 y cant yn y sector preifat a'r trydydd sector.
- Cynlluniau digidol clir: Mewn awdurdodau lleol, dywedodd 16 y cant fod ganddynt gynllun clir ar waith bob amser, o'i gymharu â 34 y cant yn y sector preifat a'r trydydd sector.
- Ymgysylltu â thechnoleg sy'n dod i'r amlwg: Dywedodd 33 y cant o ymatebwyr awdurdodau lleol eu bod yn anaml yn ymgysylltu â thechnoleg sy'n dod i'r amlwg, o'i gymharu â 12 y cant yn y sector preifat a'r trydydd sector.
- Rhannu dysgu ar draws sefydliadau: Ymhlith ymatebwyr awdurdodau lleol, dywedodd 30 y cant eu bod yn anaml yn rhannu dysgu ar draws sefydliadau, gan ostwng i 19 y cant ymhlith darparwyr sector preifat a thrydydd sector.
Mae awdurdodau lleol yn aml yn rheoli prosiectau digidol ar raddfa fwy ar draws gwasanaethau lluosog, a all fod yn anoddach eu cydlynu ac adnoddau.
Efallai y bydd gan ddarparwyr preifat a thrydydd sector benderfyniadau mwy ystwyth, gan eu galluogi i gynllunio ac arloesi'n haws.
Beth mae'r adroddiad yn ei argymell
Mae'r adroddiad yn argymell nifer o gamau y gellid eu cymryd i helpu gofal cymdeithasol i gyrraedd ei botensial digidol.
Rhai o'r argymhellion sy'n ymwneud ag arweinyddiaeth a strategaeth ddigidol yw:
Darparu hyfforddiant arweinyddiaeth ddigidol -
Mae'r adroddiad yn argymell darparu hyfforddiant arweinyddiaeth ddigidol wedi'i dargedu ar gyfer arweinwyr gofal cymdeithasol, yn enwedig mewn awdurdodau lleol lle mae hyder yn is.
Dylai'r hyfforddiant fod yn hygyrch ac yn berthnasol i arweinwyr ar wahanol lefelau, gan gydnabod cyfrifoldebau amrywiol ar gyfer strategaeth a gweithredu digidol.
Gallai hyfforddiant wedi'i dargedu helpu i adeiladu hyder arweinwyr a, dros amser, gwella sut maen nhw'n hyrwyddo mentrau gan ddefnyddio dulliau digidol i leihau cost gofal gwell.
Gwella cyfathrebu -
Mae'r adroddiad yn argymell pwysleisio pwysigrwydd cyfathrebu clir am strategaeth ddigidol i helpu i gynyddu dealltwriaeth ac ymgysylltiad staff a phontio'r bwlch rhwng arweinyddiaeth a staff rheng flaen.
Gallai hyn ffurfio elfen o unrhyw hyfforddiant datblygu arweinyddiaeth sy'n cael ei ddatblygu.
Egluro canllawiau ar gyfer technolegau sy'n dod i'r amlwg -
Mae'r adroddiad yn argymell datblygu canllawiau clir ar ddulliau sefydliadol o ddeallusrwydd artiffisial sy'n pwysleisio ei berthnasedd a'i gymwysiadau posibl mewn gofal cymdeithasol, gan helpu i ddad-dirgelu'r maes technoleg newydd hwn.
Dylai canllawiau gynnwys enghreifftiau ymarferol ac astudiaethau achos sy'n dangos defnyddiau perthnasol mewn lleoliadau gofal cymdeithasol.
Mae hefyd yn argymell cefnogi arweinwyr i ymgysylltu â staff i ddeall a blaenoriaethu arloesedd digidol yn eu cyd-destun i gryfhau prosesau cynllunio strategol digidol.
Dylai hyn fod yn arbennig o wir am awdurdodau lleol, sy'n adrodd yr hyder isaf o ran arloesi digidol.
Cryfhau caffael -
Mae'r adroddiad yn argymell creu canllawiau syml i fagu hyder wrth brynu technolegau digidol sy'n gweithio i bobl, tra'n caniatáu lle ar gyfer arloesi diogel.
Mae'r argymhellion ar gyfer y sector gofal cymdeithasol cyfan, felly bydd angen i ni weithio gyda'n gilydd fel partneriaid cenedlaethol, rhanbarthol a lleol i gyd-ddatblygu cynllun gweithredu yn seiliedig ar y canfyddiadau.
Wrth ddatblygu'r cynllun gweithredu, bydd angen i ni feddwl am bwy sydd yn y sefyllfa orau i fynd â'r argymhellion ymlaen, beth mae'r argymhellion yn ei olygu yn ymarferol, pa adnoddau sydd eu hangen a sut y byddant yn cael eu hariannu.
Dargfanfod mwy
Gallwch ddarganfod mwy drwy ymweld â'n crynodebau ar sgiliau a galluoedd a TG a seilwaith, neu drwy ddarllen yr adroddiad llawn.
Defnyddiwch y ddyfais botensial ddigidol
Gallwch barhau i ddefnyddio’r ddyfais i gefnogi eich datblygiad digidol.
Os ydych chi eisoes wedi’i chwblhau unwaith, beth am ei defnyddio i wirio eich datblygiad digidol dros amser?
Anfonon ni ddolen at bawb ar ein Cofrestr ar 9 a 10 Ionawr 2025. Os nad ydych wedi derbyn eich dolen neu ddim yn gallu dod o hyd iddi, cysylltwch â digidol@gofalcymdeithasol.cymru.