Crynodeb dyfais botensial ddigidol: Sgiliau a galluoedd

Drwy ddefnyddio profiadau bywyd go iawn a dysgu o agweddau perthnasol fframweithiau presennol, fel canllaw 'Sut mae da yn edrych' Lloegr, gallai fframwaith Cymreig helpu i:

• sefydlu disgwyliadau clir ar gyfer aeddfedrwydd digidol mewn gwahanol fathau o ddarparwyr
• rhoi pwynt cyfeirio i sefydliadau ar gyfer asesu eu galluoedd presennol er mwyn arwain datblygiad hyfforddiant a chefnogaeth wedi’u targedu
• creu iaith gyffredin ar gyfer trafod aeddfedrwydd digidol ar draws y sector.

Mae’r adroddiad yn argymell cyd-gynhyrchu’r fframwaith gyda mewnbwn gan staff rheng flaen, rheolwyr a chynrychiolwyr digidol ar draws gwahanol fathau o sefydliadau er mwyn sicrhau perthnasedd a chefnogaeth. Dylai hefyd gynnwys llais pobl sy’n defnyddio gofal a chymorth, eu teuluoedd a gofalwyr di-dâl.

Dylai hefyd ddefnyddio canfyddiadau’r ddyfais botensial ddigidol i helpu gosod disgwyliadau realistig yn seiliedig ar lefelau presennol o aeddfedrwydd a llythrennedd digidol ym maes gofal cymdeithasol yng Nghymru.

Mae’r adroddiad yn argymell creu fframwaith gallu digidol gyda llwybrau dysgu hyblyg wedi’u teilwra i weithwyr gofal cymdeithasol, sy’n mynd i’r afael â gofynion unigryw eu rolau ar sail y fframwaith 'Sut mae da yn edrych'.

Mae hefyd yn awgrymu datblygu rhaglen sgiliau digidol wedi’i thargedu a fyddai’n defnyddio canfyddiadau o’r ddyfais botensial digidol, y fframwaith gallu digidol, ac yn adeiladu ar yr hyfforddiant presennol i ddatblygu rhaglen sy’n cefnogi creu gweithlu sy’n barod yn ddigidol.

Fyddai’r hyfforddiant yn dechrau gyda’r meysydd lle mae’r hyder isaf ar gyfer grwpiau penodol. Dylai’r rhaglen hefyd gydnabod ac adeiladu ar eu cryfderau presennol.

Mae’r adroddiad yn argymell sefydlu cymuned genedlaethol o ymarfer sy’n darparu lle ar gyfer rhannu gwybodaeth, cefnogaeth ac anogaeth.

Byddai hyn yn adeiladu ar y gwaith rydyn ni eisoes wedi’i wneud wrth sefydlu cymunedau cenedlaethol o ymarfer sy’n seiliedig ar dystiolaeth.

Byddai’r dull hwn yn hybu hyder y gweithlu i gefnogi eraill, gwella rhannu rhwng sefydliadau, ac yn datblygu parodrwydd digidol ar bob lefel.

Mae’r adroddiad yn argymell gwella cyfathrebu am gyfleoedd hyfforddi digidol drwy’r sianeli presennol, gan sicrhau bod staff ar bob lefel yn ymwybodol o’r adnoddau a’r gefnogaeth sydd ar gael.

Byddai hyn yn cynnwys:

• creu arwyddion clir i adnoddau hyfforddi a chadw’r rhain yn gyfredol
• defnyddio sawl sianel gyfathrebu i gyrraedd grwpiau staff gwahanol
• amlygu straeon llwyddiant a buddion datblygu sgiliau digidol
• sicrhau bod gwybodaeth ar gael yn Gymraeg ac yn Saesneg ac wedi’i optimeiddio ar gyfer offer cynorthwyol fel darllenwyr sgrin.

Ystyriaeth allweddol yw y dylid teilwra’r wybodaeth i wahanol gynulleidfaoedd, gan gydnabod y lefelau hyder digidol amrywiol ar draws y gweithlu.