Grŵp ymarfer sy’n seiliedig ar dystiolaeth yn Sir Gâr

Beth yw'r prosiect?

Mae'r grŵp ymarfer sy’n seiliedig ar dystiolaeth yng Ngwasanaethau Cymdeithasol Sir Gâr yn fan lle gall aelodau rannu adnoddau, diweddariadau a digwyddiadau i hyrwyddo gwneud penderfyniadau sydd wedi'u cyfoethogi gan dystiolaeth mewn gwaith cymdeithasol.  

Mae'r aelodau hefyd yn dod ynghyd i drafod ymchwil a thystiolaeth gofal cymdeithasol mewn gwahanol ffyrdd ac i gysylltu ymarferwyr ag ymchwilwyr ac aelodau o Gymuned Dystiolaeth Gofal Cymdeithasol Cymru. 

Nod y grŵp yw annog ymarferwyr gofal cymdeithasol i ymgysylltu ag ymchwil gofal cymdeithasol a'i gyflwyno i'w ymarfer. 

Cwblhaodd y grŵp set dysgu gweithredol i osod ei flaenoriaethau ar gyfer y flwyddyn gyda chefnogaeth Datblygu Ymarfer a Gyfoethogir gan Dystiolaeth (DEEP) ac arweinydd symudedd gwybodaeth Gofal Cymdeithasol Cymru.

Grŵp o bobl mewn gweithle yw set dysgu gweithredol sy'n cwrdd â'r bwriad penodol o ddatrys problemau yn y gweithle. Prif nod set dysgu gweithredol yw dod i ffwrdd â set o gamau gweithredu realistig a fydd yn helpu i ddatrys neu ddeall y problemau. 

Blaenoriaethau presennol y grŵp yw: 

• ansawdd bywyd mewn cartrefi gofal
• cam-drin plant i rieni
• niwroamrywiaeth
• effaith COVID
• gwydnwch tîm.

Mae'r grŵp yn denu mwy o ddiddordeb ac yn ddiweddar cafodd ei ofyn i gefnogi cydlynu cynhadledd ar gyfer gofalwyr di-dâl. 

Pam mae'n cael ei gynnal?

Mae ymarferwyr gofal cymdeithasol yn wynebu nifer o rwystrau rhag ymgysylltu'n ystyrlon ag ymchwil gofal cymdeithasol, gan gynnwys amser a mynediad.

Mae'r grŵp hwn wedi'i greu i helpu i chwalu'r rhwystrau hyn ac adeiladu hyder ymarferwyr i ymgysylltu â thystiolaeth.

Ble a phryd mae'r gwaith yn cael ei wneud?

Mae'r gwaith yn digwydd yn Sir Gâr, ac mae aelodau'r grŵp yn cyfarfod ar-lein ac mewn person.

Pwy sy'n cymryd rhan?

Mae dros 80 o weithwyr cymdeithasol wedi cofrestru i fod yn rhan o'r grŵp hwn. Mae tîm DEEP a symudedd gwybodaeth Gofal Cymdeithasol Cymru wedi cefnogi'r grŵp i weithredu dulliau gwahanol a chreadigol i rannu ymchwil gofal cymdeithasol.

Mae'r grŵp yn gwahodd siaradwyr gwadd yn rheolaidd i rannu eu gwybodaeth, fel Gwasanaethau Cymdeithasol Castell-nedd Port Talbot, sydd hefyd yn ceisio gwreiddio diwylliant ymchwil.

Beth maen nhw wedi'i ddysgu hyd yn hyn?

Mae gweithwyr cymdeithasol wedi bwydo nôl bod rhannu gwybodaeth a phrofiad ar draws timau a disgyblaethau wedi bod yn brofiad gwerthfawr. 

Mae cyfarfod mewn person yn cael ei groesawu ac mae'n cefnogi creu cysylltiadau ar draws yr awdurdod a thu hwnt, gan rannu gwybodaeth. 

Mae gweithwyr cymdeithasol yn gwerthfawrogi sut mae'r grŵp wedi'i wreiddio'n ymarferol ac yn ceisio mynd i'r afael â blaenoriaethau ymarfer yn uniongyrchol.  

Darganfod mwy

I gael gwybod mwy am y grŵp hwn, cysylltwch â Mair Davies yng Ngwasanaethau Cymdeithasol Sir Gâr ar mair.davies@sirgar.gov.uk.