Rhowch eich barn am safonau data drafft newydd ar gyfer gofal cymdeithasol

Pam ydyn ni’n datblygu safonau data?

Mae sefydliadau ar draws iechyd a gofal cymdeithasol wedi bod yn edrych ar ffyrdd o wella’r ffordd mae gwybodaeth yn cael ei rhannu ers blynyddoedd lawer.

Un her gyffredin yw bod gwybodaeth yn gallu cael ei chofnodi’n wahanol rhwng sefydliadau, timau a systemau. Hyd yn oed pan fo pobl yn cofnodi gwybodaeth debyg, efallai eu bod yn defnyddio termau, diffiniadau neu ddulliau gwahanol.

Gall hyn ei gwneud hi’n anoddach cymharu gwybodaeth, rhannu data pan fo angen a meithrin dealltwriaeth gyson o anghenion a phrofiadau pobl.

Mae safonau data yn helpu i fynd i’r afael â’r her hon drwy greu dealltwriaeth gyffredin o wybodaeth bwysig.

Drwy gytuno ar ddiffiniadau a therminoleg gyffredin, gall sefydliadau fod yn fwy hyderus bod gwybodaeth yn golygu’r un peth ble bynnag mae''n cael ei chofnodi neu ei defnyddio.

Rydyn ni'n gweithio gyda BetterGov ac Answer Digital i gyflawni'r gwaith hwn.

Beth yw safonau data gweithredu lleiaf?

Mae safonau data gweithredu lleiaf yn set gytûn o eitemau data hanfodol, diffiniadau a therminoleg.

Maen nhw’n diffinio darnau pwysig o wybodaeth a sut y dylid eu deall, gan helpu i greu cysondeb ar draws sefydliadau a systemau.

Nid y nod yw gwneud i bob sefydliad weithio yn union yr un ffordd. Yn hytrach, mae safonau data gweithredu lleiaf yn canolbwyntio ar y wybodaeth bwysicaf i’w rhannu a’i deall yn gyson.

Mae’r dull hwn yn helpu i greu cysondeb tra’n caniatáu i sefydliadau a gwasanaethau barhau i weithio mewn ffyrdd sy’n diwallu anghenion lleol.

Dysgwch fwy ar ein tudalen safonau data.

Byddwn ni bob amser yn gwneud ein gorau i esbonio’r gwaith hwn yn glir, ond rydyn ni’n deall y gallech ddod ar draws geiriau neu dermau anghyfarwydd o bryd i’w gilydd. Os bydd hynny’n digwydd, efallai y byddwch yn dod o hyd i’r term rydych yn chwilio amdano yn ein canllaw A i Y o dermau safonau data.

Sut gwnaethon ni ddatblygu’r safonau drafft?

Rydyn ni wedi datblygu’r safonau drafft drwy ymgysylltu’n helaeth â’r sector gofal cymdeithasol yng Nghymru.

Fe wnaethon ni weithio gyda gweithwyr proffesiynol ar draws awdurdodau lleol, partneriaethau rhanbarthol a darparwyr gwasanaethau er mwyn deall pa wybodaeth sydd bwysicaf i’w chofnodi a’i rhannu.

Fe wnaeth y gwaith hwn ein helpu i nodi meysydd blaenoriaeth, sef yr achosion defnydd, lle gallai safonau cyffredin ddod â’r budd mwyaf.

I ddatblygu’r safonau, fe wnaethon ni sefydlu grŵp ysgrifennu a gwahodd pobl o wahanol rolau ledled Cymru i'w ymuno, gan gynnwys:

• ymarferwyr
• rheolwyr
• arbenigwyr data
• gweithwyr proffesiynol digidol

Gan weithio ochr yn ochr ag arbenigwyr safonau data, fe wnaeth aelodau’r grŵp adolygu eitemau data arfaethedig, trafod diffiniadau a chytuno ar gynnwys y safonau drafft.

Mae’r dull cydweithredol hwn yn helpu i sicrhau bod y safonau wedi’u seilio ar ymarfer ac wedi’u llunio gan bobl sy’n deall y sector.

Os hoffech wybod mwy am gefndir y prosiect hwn, mae ein Pennaeth Rhaglenni Data Strategol, Owen Davies, wedi ysgrifennu blog am y gwaith sydd wedi’i wneud hyd yma.

Pam ydyn ni’n gofyn am adborth?

Mae’r grŵp ysgrifennu wedi datblygu’r safonau drafft, ond rydyn ni’n gwybod na all un grŵp gynrychioli pob safbwynt ar draws gofal cymdeithasol.

Dyna pam rydyn ni’n gwahodd y sector ehangach i adolygu’r drafftiau a rhoi eu barn i ni.

Rydyn ni eisiau gwybod:

• a yw’r safonau’n hawdd eu deall?
• a yw’r diffiniadau’n gwneud synnwyr?
• a oes unrhyw beth ar goll?
• a allai unrhyw ran o’r safonau fod yn anodd ei rhoi ar waith yn ymarferol?
• a oes unrhyw effeithiau anfwriadol y dylen ni eu hystyried?

Bydd clywed ystod eang o safbwyntiau yn rhoi mwy o hyder i ni y bydd y safonau’n diwallu anghenion y sector.

Pwy ddylai gymryd rhan?

Hoffen ni glywed gan unrhyw un sy’n ymwneud â darparu, rheoli, dadansoddi neu wella gwasanaethau gofal cymdeithasol.

Does dim angen gwybodaeth dechnegol arbenigol i roi adborth. Cafodd y safonau eu datblygu i gefnogi ymarfer gofal cymdeithasol, felly mae adborth gan bobl sy’n gweithio’n uniongyrchol yn y sector a’r tu hwnt iddo yn arbennig o werthfawr.

Beth sy’n digwydd ar ôl y cyfnod adborth?

Unwaith y bydd y cyfnod adborth yn dod i ben, byddwn yn adolygu’r holl ymatebion ac yn nodi themâu, materion ac awgrymiadau cyffredin.

Lle bydd angen gwneud newidiadau, bydd yr adborth yn cael ei drafod gyda’r grŵp ysgrifennu a’i ddefnyddio i fireinio’r safonau.

Byddwn yn cyhoeddi crynodeb o’r adborth rydyn ni'n ei derbyn ac yn esbonio sut y mae wedi llywio cam nesaf y gwaith datblygu.