Rydyn ni'n credu y bydd creu mannau i gysylltu a datblygu perthnasoedd yn arwain at newid parhaol a chadarnhaol.
Mae ein cymunedau yn dod ag ymarferwyr gofal cymdeithasol, arloeswyr a phobl sydd â phrofiad byw ynghyd i greu'r egni a'r momentwm ar gyfer newid.
Maen nhw’n fannau i bobl rannu eu gwybodaeth a’u syniadau ac i ddysgu gan eraill, gan greu perthnasoedd ar draws gwahanol sectorau ledled Cymru.
Mae'r cymunedau'n cyfarfod ar-lein a mewn person, tra gall aelodau hefyd gysylltu trwy blatfform ar-lein.
Yma, mae’r Grŵp Gwybodaeth yn cyflwyno rhai o uchafbwyntiau’r hyn sydd wedi bod yn digwydd yn ein cymunedau dros y ddau fis diwethaf.
Cymuned Dystiolaeth
Daeth ein Cymuned Dystiolaeth at ei gilydd ym mis Medi ar gyfer sesiwn ‘Myfyrio ar Dystiolaeth’ am ein crynodeb tystiolaeth newydd ar gefnogi pobl i wneud penderfyniadau am eu gofal.
Roedd yr adborth ar y sesiwn yn gadarnhaol iawn, gyda llawer o bobl yn dweud y bydden nhw nawr yn rhannu’r crynodeb gyda chydweithwyr, a rhai yn dweud y bydden nhw’n ei ddefnyddio fel rhan o adolygiad o bolisïau a phecynnau hyfforddi.
Ym mis Hydref, cynhaliodd y gymuned dri gweithdy ‘Sgyrsiau Ymchwil’ ar themâu cydweithio ym meysydd diogelu, gwaith cymdeithasol gyda phobl hŷn, a chamfanteisio’n droseddol ar blant. Fe wnaeth y sesiynau hyn gwahodd ymchwilwyr o Brifysgol Caerdydd a Phrifysgol Sunderland i rannu eu canfyddiadau â'r gymuned.
Cafodd blog diddorol am osgoi rhai o sgil-effeithiau negyddol posibl cyd-gynhyrchu ei gyhoeddi ar lwyfan ar-lein y gymuned, ynghyd â nifer o flogiau ac eitemau newyddion eraill.
Roedd trafodaeth hefyd ar y llwyfan am effaith newid hinsawdd ar ofal cymdeithasol. Rhannodd aelodau rhai o’r adnoddau maen nhw’n gweithio arnyn nhw yn eu sefydliadau gwahanol i geisio mynd i’r afael â’r mater.
Ymunwch â’r Gymuned Dystiolaeth
Cymuned Unigolion Cyfrifol
Ar ôl yr haf, dechreuodd y Gymuned Unigolion Cyfrifol system nodi dyddiadur newydd er mwyn helpu i wella presenoldeb yn y cyfarfodydd misol a diogelu amser aelodau. Mae hyn wedi cael derbyniad da o ystyried cyfyngiadau amser ac amserlenni prysur bobl.
Mae'r gymuned bellach yn cynnal cyfarfod misol bob ail ddydd Gwener o'r mis.
Roedd cyfarfod mis Medi yn gyfle i Unigolion Cyfrifol gwrdd â Mathew Morgan, sy’n goruchwylio’r gymuned tan yr haf nesaf.
Fe wnaeth yr aelodau myfyrio ar y mewnwelediadau cafodd eu rhannu yng nghyfarfod mis Awst, a gyda’i gilydd dechrau datblygu themâu ar gyfer y digwyddiad deialog ar y cyd nesaf gydag Arolygiaeth Gofal Cymru (AGC).
Mae’r digwyddiadau hyn yn dod ag arolygwyr AGC ac Unigolion Cyfrifol ynghyd i drafod gwahanol bynciau. Maen nhw’n dilyn digwyddiad peilot llwyddiannus yn gynharach yn y flwyddyn. Rydyn ni’n gweithio gyda Nick Andrews o Ddatblygu Ymarfer a Gyfoethogir gan Dystiolaeth (DEEP) i gyflwyno’r sesiynau hyn.
Ym mis Hydref, canolbwyntiodd y cyfarfod cymunedol ar ymarfer sy’n seiliedig ar gryfderau, gyda'r siaradwyr gwadd Jessica Matthews a Jay Goulding o Ofal Cymdeithasol Cymru. Cafodd y grŵp drafodaeth gyfoethog a chraff am reoli perthnasoedd fel arweinwyr, sut i fuddsoddi mewn Unigolion Cyfrifol newydd, a sut i gynyddu mynediad at ffrindiau beirniadol.
Ymunwch â’r Gymuned Unigolion Cyfrifol
Cymuned Modelau Newydd o Ofal Preswyl i Blant
Ymunodd aelodau o’r gymuned â mwy na 100 o fynychwyr eraill ar gyfer y Gynhadledd Gofal Preswyl i Blant, cafodd ei gynnal yng Nghaerdydd a Llandudno ym mis Medi. Yn ystod y dydd, fe wnaethon nhw myfyrio ar ein crynodeb tystiolaeth newydd am gefnogi canlyniadau cadarnhaol mewn gofal preswyl i blant, a chlywed gan Gyngor Sir y Fflint, Action for Children ac Amberleigh Care am sut maen nhw wedi gweithredu a chynnal modelau gofal. Daeth y diwrnod i ben gyda DEEP yn arwain ymarfer ‘ennyd euraidd’, a’r uchafbwynt i lawer oedd clywed gan gomisiynwyr ifanc Consortiwm Comisiynu Cymru ar gyfer Plant (4Cs) am eu profiadau o ofal a beth sy'n cynrychioli gofal da iddyn nhw.
Ym mis Hydref, daeth Dr Lisa Holmes i siarad â’r gymuned am gynhadledd ryngwladol ACORES 2024, y gwnaeth hi helpu i’w rhoi at ei gilydd. Rhoddodd grynodeb o'r cyflwyniadau ar y gwahanol fodelau gofal a gafodd sylw yn y gynhadledd. Bydd cyflwyniadau o’r gynhadledd ar gael cyn bo hir ar wefan Cymdeithas Gwasanaethau Preswyl a Chymunedol i Blant (ACRC), ynghyd â digwyddiadau sydd i ddod, grwpiau polisi a gweminarau.
Cymuned Gofal sy’n Seiliedig ar Le
Er gwaethaf gorfod canslo digwyddiad ym mis Medi, parhaodd y Gymuned Gofal sy’n Seiliedig ar Le i ddod ag aelodau at ei gilydd trwy ei sesiynau ‘Coffi a Chyswllt’.
Ymhlith y pynciau cafodd eu trafod yn ystod y sesiynau oedd digwyddiadau, mentrau newydd, trafnidiaeth mewn ardaloedd gwledig, a llesiant.
Ymunwch â’r Gymuned Gofal sy’n Seiliedig ar Le
Beth sydd i ddod?
- Mae'r Gymuned Gofal sy’n Seiliedig ar Le yn cynnal digwyddiad ar 4 Tachwedd i drafod ein crynodeb o dystiolaeth ynghylch cefnogi pobl i wneud penderfyniadau am eu gofal. Bydd y drafodaeth yn ymdrin â meysydd fel asiantaeth, gallu a chymryd risgiau cadarnhaol. Mae’r digwyddiad hwn yn dilyn awgrym aelod ynghylch arbrofi gyda ffyrdd newydd o ddod â gwybodaeth ddiddorol i’r gymuned mewn ffordd gryno. Archebwch eich lle.
- Bydd y Gymuned Gofal sy’n Seiliedig ar Le hefyd yn cynnal sesiwn am Systemau Dysgu Dynol ar 19 Tachwedd, lle gallwch glywed gan bobl sydd wedi bod yn meddwl am y dull gweithredu mewn perthynas â dulliau sy’n seiliedig ar le. Cafodd y digwyddiad hwn hefyd ei awgrymu gan aelodau, tra bydd rhai ar y panel. Archebwch eich lle.
- Bydd y Gymuned Dystiolaeth yn cynnal ei sesiwn ‘Myfyrio ar Dystiolaeth’ nesaf ar 7 Tachwedd, y tro hwn yn canolbwyntio ar ein crynodeb o dystiolaeth am gefnogi pobl niwrowahanol a’u teuluoedd. Archebwch eich lle.
- Mae'r Gymuned Dystiolaeth hefyd yn cynnal cymuned ymholi ar destun goruchwyliaeth mewn gwaith cymdeithasol plant a theuluoedd ar 20 Tachwedd. Mae’r digwyddiad hwn yn llawn, ond cysylltwch â rhiannon.wright@gofalcymdeithasol.cymru os hoffech chi gael eich ychwanegu at y rhestr wrth gefn.
- Bydd cyfarfod nesaf y Gymuned Unigolion Cyfrifol yn digwydd ar 8 Tachwedd. Mae hwn yn ofod diogel i Unigolion Cyfrifol a'r rhai a fydd yn ymgymryd â'r rôl yn fuan. I ddarganfod mwy am y digwyddiad, ymunwch â'r gymuned.
- Bydd digwyddiad deialog y Gymuned Unigolion Cyfrifol ag arolygydd AGC yn digwydd ar 27 Tachwedd. Bydd yn canolbwyntio ar y thema 'Dod o hyd i'r cydbwysedd - archwilio cymhlethdodau arfer sy'n canolbwyntio ar berthnasoedd a ffiniau proffesiynol'. Mae'r digwyddiad hwn yn llawn.
