Dod o hyd i dystiolaeth

Mae nifer o sefydliadau gyda gwefannau gall eich helpu i ddod o hyd i dystiolaeth ddibynadwy. Mae llawer o'r sefydliadau hyn hefyd yn darparu gwybodaeth am bolisi ac arfer sy'n ymwneud â'u maes diddordeb.

Rydyn ni wedi rhestru ffynonellau dibynadwy: mae ansawdd y data eisoes wedi'i asesu ac rydyn ni wedi cynnwys crynodeb o'r hyn sydd ar bob wefan.

Rhestr sefydliadau ac adnoddau

Be part of research: mae'r wefan wedi ei gynnal gan Sefydliad Cenedlaethol dros Ymchwil Iechyd a Gofal (NIHR). Mae'n wasanaeth ar draws y DU sy'n helpu pobl dod o hyd i, a chyfrannu at, ymchwil iechyd a gofal. Gallwch chi ei ddefnyddio i chwilio a hidlo ar gyfer astudiaethau yn y meysydd sydd o ddiddordeb i chi ac mae cofrestr o wirfoddolwyr sy'n gallu cysylltu â chi'n uniongyrchol i roi gwybod am astudiaethau sy'n berthnasol i chi.
Canolfan Llesiant ‘What Works': roedd y ganolfan hon yn bodoli rhwng 2014 a 2024 ac yn canolbwyntio ar lesiant, yn gweithio gyda rhanddeiliaid ac arbenigwyr i ddarparu tystiolaeth, arweiniad, a phapurau trafod ar amrywiaeth o bynciau. Mae'n bosib cael mynediad at yr adnoddau o hyd ar ei gwefan.
Partneriaeth Canolfan Ymchwil a Datblygu Gofal Cymdeithasol Plant (CASCADE): nod CASCADE, sydd wedi'i hariannu gan Ymchwil Iechyd a Gofal Cymru, yw gwella llesiant, diogelwch a hawliau plant a'u teuluoedd. Mae gan wefan CASCADE amrywiaeth o gyhoeddiadau ac adnoddau sy’n cyfrannu at ddod â phrofiadau ac arbenigedd at ei gilydd ar gyfer ymarferwyr, pobl sy’n defnyddio gofal a chymorth, ac ymchwilwyr. Mae CASCADE hefyd yn gartref i ExChange - rhaglen symudedd gwybodaeth.
Cyngor Ymchwil Economaidd a Chymdeithasol (ESRC): mae ESRC yn rhan o UK Research and Innovation (UKRI), sy’n dwyn ynghyd saith cyngor ymchwil y DU, Innovate UK a Research England. Mae ESRC yn ariannu ymchwil ar draws ystod eang o bynciau yn y gwyddorau cymdeithasol, gan gynnwys iechyd a llesiant, gwasanaethau cyhoeddus a chymdeithas. Gallwch chi archwilio meysydd buddsoddi a chymorth yr ESRC, a chael mynediad i 'becyn cymorth effaith' i helpu gyda cheisiadau am gyllid.
Gofal Cymdeithasol Cymru: rydyn ni’n darparu canllawiau ymarfer cenedlaethol ac ystod o adnoddau ymchwil, data ac arloesi trwy ein prif wefan a'r: Grŵp Gwybodaeth.
Mae Porth Data Gofal Cymdeithasol Cenedlaethol Cymru yn cynnwys data o amrywiaeth o ffynonellau sy'n ymwneud â gwasanaethau gofal cymdeithasol.
Foundations, Canolfan ‘What Works’ ar gyfer Plant a Theuluoedd: mae'n darparu atebion a datrysiadau ymarferol sy’n grymuso’r rhai sy’n gwneud penderfyniadau i wella polisi ac ymarfer ar gymorth i deuluoedd. Mae’r gwaith yn seiliedig ar yr egwyddor y dylai tystiolaeth o ansawdd uchel lywio'r broses o wneud penderfyniadau a chwarae rôl hanfodol wrth wella bywydau plant sy'n agored i niwed. Mae Llawlyfr ar y wefan, sy’n rhoi gwybodaeth am ymchwil sydd eisoes yn bodoli a dros 130 o ymyrriadau a gall cefnogi gwneud penderfyniadau.
Llyfrgell Cochrane: mae'n rhoi mynediad at ganfyddiadau ymchwil i gefnogi gwneud penderfyniadau ar sail tystiolaeth gan weithwyr proffesiynol, llunwyr polisi a’r cyhoedd. Mae Cochrane yn cynnwys grwpiau adolygu sydd wedi'u lleoli mewn sefydliadau ymchwil ledled y byd. Mae'r dudalen 'ein tystiolaeth' yn cynnwys crynodebau mewn iaith glir o dystiolaeth iechyd.
Research in Practice: mae'n cefnogi pobl sy'n gweithio ym maes gofal cymdeithasol ac iechyd i wella canlyniadau i oedolion sydd ag anghenion cymorth a phlant a theuluoedd. Mae’n dod ag arbenigedd ymarfer a phrofiadau pobl sy’n defnyddio gwasanaethau ynghyd fel y gall gweithwyr proffesiynol ar draws y sector wneud penderfyniadau ar sail tystiolaeth ynghylch dylunio a darparu gwasanaethau. Mae'r ganolfan yn llunio adolygiadau tystiolaeth 'Insights' sy'n crynhoi'r ymchwil a'r dystiolaeth sydd ar gael ar bynciau penodol sy'n ymwneud â chymorth i oedolion, plant a theuluoedd.
Sefydliad Iechyd a Gofal Cymdeithasol Cymru (WIHSC): mae WIHSC, sydd wedi ei gynnal gan Brifysgol De Cymru, yn pontio bylchau rhwng y byd academaidd, polisi ac ymarfer, ac mae ei wefan yn cynnwys tudalen canfod allbynnau ymchwil.
StatsCymru: gwasanaeth rhad ac am ddim sy’n eich galluogi i weld, trin, creu a lawrlwytho tablau o ddata Cymreig.
Ymchwil Iechyd a Gofal Cymru: tudalen ymchwil a ariennir, sy'n rhoi cyfle i chi chwilio am ymchwil cyfredol neu wedi ei gwblhau. Gallwch chi hefyd chwilio yn ôl sefydliad Cymreig.
Ymchwil Iechyd a Gofal Cymru - Llyfrgell adroddiadau'r Ganolfan Dystiolaeth: mae'r ganolfan yn cynnal ymchwil sy'n llywio polisi ac ymarfer iechyd a gofal yng Nghymru. Gellir chwilio'r llyfrgell adroddiadau, ac yn benodol chwilio am ofal cymdeithasol fel pwnc. Mae'n cynnwys gwaith gorffenedig a chyfredol.
Y Sefydliad Cenedlaethol ar gyfer Ymchwil Iechyd (NIHR): ariannwr mwyaf y DU ar gyfer ymchwil iechyd a gofal. Mae’n gweithio mewn partneriaeth â’r GIG, prifysgolion, llywodraeth leol, cyllidwyr ymchwil eraill, cleifion a’r cyhoedd i gyflawni a galluogi ymchwil. Mae offeryn chwilio tystiolaeth ar gyfer gweithwyr iechyd a gofal proffesiynol, ymchwilwyr a'r cyhoedd ar y wefan. Gallwch chi hefyd gael mynediad i lyfrgell cyfnodolion a NIHR Evidence, sy'n darparu crynodebau mewn iaith glir o ymchwil iechyd a gofal sy’n cael ei ariannu gan NIHR.
Y Sefydliad Cenedlaethol dros Ragoriaeth mewn Iechyd a Gofal (NICE): mae NICE yn darparu asesiad annibynnol o dystiolaeth gymhleth i gynhyrchu canllawiau defnyddiol a defnyddiadwy ar gyfer ymarferwyr iechyd a gofal. Mae ganddo gymuned sy'n ymroddedig i ofal cymdeithasol, lle gallwch chi fanteisio ar ganllawiau, safonau ansawdd, offer ac adnoddau. Mae hefyd yn crynhoi ei gynhyrchion sy'n ymwneud â gofal cymdeithasol oedolion a gofal cymdeithasol plant, ac yn cynnig cyngor ar sut i ddefnyddio ei ganllawiau mewn gwaith cymdeithasol.
Y Sefydliad Gofal Cymdeithasol er Rhagoriaeth (SCIE): asiantaeth sy’n cydgynhyrchu, sy'n rhannu ac sy'n cefnogi’r defnydd o’r wybodaeth a’r dystiolaeth orau sydd ar gael am yr hyn sy’n gweithio’n ymarferol.
Y Sefydliad Ymchwil ac Arloesi yn y Gwasanaethau Cymdeithasol (Iriss): sefydliad Albanaidd sydd â hanes helaeth o gyflwyno a defnyddio tystiolaeth ar y cyd wrth ddatblygu polisi ac ymarfer. Mae holl adnoddau Iriss ar gael am ddim, gan gynnwys eu crynodebau tystiolaeth.
Y Swyddfa Archwilio Genedlaethol (NAO): yr NAO yw corff gwarchod gwariant cyhoeddus annibynnol y DU. Chwiliwch drwy adroddiadau'r Swyddfa Archwilio Genedlaethol neu gyrchwch ganllawiau arfer da trwy ei thudalen 'Insights'.