2. Ynglŷn â diwylliannau cadarnhaol

Beth y mae diwylliant cadarnhaol yn edrych fel?

Dywedodd bobl wrthon ni mai diwylliant cadarnhaol yw un lle y mae:

• pawb yn teimlo bod rhywun yn gwrando arnyn nhw ac yn eu clywed, a’u bod o werth
• sefydliadau’n cydnabod, derbyn a pharchu gwahaniaeth ac amrywiaeth
• arweinwyr a rheolwyr yn canolbwyntio ar recriwtio, meithrin, herio a chefnogi’r ymddygiad a’r gwerthoedd y maen nhw eisiau eu gweld
• sefydliadau cenedlaethol a lleol yn gweithio gyda’i gilydd a chefnogi ei gilydd i ddeall beth sy’n bwysig i bobl a’u cymunedau
• arweinwyr a rheolwyr, ar bob lefel, yn deall pam ei bod yn bwysig bod gan eu sefydliad
  ddiwylliant cadarnhaol
• sefydliadau cenedlaethol a lleol yn gweithio gyda’i gilydd i hyrwyddo hawliau pobl
• y sefydliad a’i holl systemau a phrosesau’n cefnogi staff i wneud beth sy’n bwysig i bobl
• sefydliadau sy’n dylunio a darparu gwasanaethau’n cynnwys y bobl sy’n derbyn y gofal a’r
  cymorth yn y prosesau hyn
• sefydliadau yn edrych tuag allan, yn gynhwysol ac yn creu partneriaethau gweithio gyda’u
  cymunedau i gefnogi canlyniadau llesiant pobl.

Mae’n bwysig gwneud yn siŵr bod gofal cymdeithasol yn wrth-wahaniaethol a gwrth-hiliol. Dylai pawb hefyd gydnabod bod gwrth-wahaniaethu’n cyd-fynd â gofal da.

Mae diwylliant cadarnhaol yn gynhwysol, teg a chyfartal gan hyrwyddo a gwerthfawrogi amrywiaeth yn rhagweithiol.

Mae sefydliadau gofal cymdeithasol yn tyfu a ffynnu drwy gydnabod bod amrywiaeth yn fuddiol i’w gweithle. 

Gallwn ddweud llawer am ddiwylliant sefydliad drwy edrych ar:

• sut y mae’r sefydliad yn trin y bobl a’r cymunedau sy’n derbyn gofal neu gymorth
• sut y mae’r sefydliad yn gwneud ei waith
• beth y mae pobl yn ei ddweud am eu gofal a chymorth
• sut y mae staff yn teimlo am weithio yno
• beth y mae pobl eraill yn ei feddwl a’i ddweud am y sefydliad
• sut y mae’n derbyn ac ymateb i gwynion ac adborth.

Mae’r pethau hyn fel arfer yn cael eu heffeithio gan:

• y bobl sy’n arwain a thywys eraill (gan gynnwys rheolwyr ac arweinwyr tîm neu gymunedol),
  a’u dull o arwain
• gwerthoedd, egwyddorion a pholisïau’r sefydliad a sut y mae’n eu gweithredu
• gwerthoedd ac ymddygiad tîm.