1. Ynglŷn â’r canllaw hwn

Rhagair

Mae cymdeithas yn newid ar garlam. Mae’r mathau o bobl sy’n defnyddio gwasanaethau gofal cymdeithasol, a’r bobl sy’n rhoi gofal a chymorth iddyn nhw, hefyd yn newid.

Ni allwn roi pwyslais rhy fach ar ddiwylliant sefydliad. Wrth ddiwylliant, golygwn ‘y ffordd y mae pethau’n cael eu gwneud yma’.

Mae hyn yn cynnwys dull arweinyddiaeth sefydliad, ei werthoedd a’i ymddygiad, systemau a phrosesau a’r partneriaethau sy’n ategu ei ffordd o weithio.

Mae diwylliant ein sefydliadau’n effeithio ar sut rydyn ni’n darparu gofal a chymorth ac ar ansawdd y gwasanaethau – gan gynnwys pa mor dda y cefnogwn ganlyniadau llesiant pobl sy’n derbyn cymorth a gofal, a sut y mae staff yn teimlo am eu gwaith.

Yng Nghymru, mae ein deddfwriaeth – gan gynnwys Deddf Gwasanaethau Cymdeithasol a Llesiant (Cymru) 2014 a Deddf Rheoleiddio ac Arolygu Gofal Cymdeithasol (Cymru) 2016 – wedi’i hategu gan ddull cryfderau a hawliau o weithio.

Drwy ddefnyddio’r ddeddfwriaeth yma, gallwn rannu dealltwriaeth ac ymrwymiad i greu a chynnal diwylliannau cadarnhaol fel bo’r bobl sy’n defnyddio neu’n rhoi gofal a chymorth yn gallu ffynnu. 

Gwyddom eich bod eisoes efallai’n datblygu diwylliant cadarnhaol ac yn gwneud pethau i wella ansawdd canlyniadau gofal a llesiant i unigolion.

Pleser mawr felly yw cyflwyno – gyda’n gilydd – y canllaw hwn i’ch helpu i greu, cynnal a gwella diwylliant eich sefydliad.

Mae arweinwyr a rheolwyr yn ganolog i greu a chynnal diwylliant sefydliadol.

Fel arweinwyr yn ein sefydliadau, ymrwymwn i ganolbwyntio ar hawliau a chryfderau pobl. Rydyn ni’n gweithio’n dosturiol i wreiddio diwylliannau cadarnhaol ym mhob agwedd ar ein gwaith – yn unigol a
gyda’n gilydd. Rydyn ni’n falch o’ch helpu chi i wneud yr un peth.

Albert Heaney CBE, Prif Swyddog Gofal Cymdeithasol Cymru

Gillian Baranski, Prif Arolygydd Arolygiaeth Gofal Cymru (AGC)

Sarah McCarty, Prif Weithredwr Gofal Cymdeithasol Cymru