Skip to Main content

Egwyddor 2: mae gan ddiwylliannau cadarnhaol arweinwyr tosturiol

Dyddiad diweddaru diwethaf: 9 Meh 2025

Gwrandewch ar Fôn yn siarad am arweinwyr tosturiol mewn diwylliant cadarnhaol.

Mae arweinwyr sefydliad a’u dull o arwain yn cael effaith anferth ar ddiwylliant gweithle. 

Beth yw arweinyddiaeth dosturiol?

Mae arweinyddiaeth dosturiol yn golygu ymrwymo i roi’r cymorth iawn i’n cydweithwyr, partneriaid a’r bobl yn ein timau. Mae’n eu helpu i ymateb yn effeithiol i heriau ac i ffynnu yn eu gwaith.

Mae’n rhan allweddol o’r strategaeth gweithle ar y cyd rhwng Gofal Cymdeithasol Cymru ac Addysg a Gwella Iechyd Cymru, Cymru Iachach.

Mae ffocws y model ar bedwar ymddygiad:

  • gwrando
  • dealltwriaeth
  • empathi
  • helpu.

Mae ganddo hefyd saith egwyddor:

  1. cytuno ar gyfeiriad, cysondeb ac ymrwymiad i weithio gyda’n gilydd
  2. creu amgylchedd lle y mae arweinyddiaeth gyfunol yn ffynnu
  3. creu amodau fel bo’n gweithle’n gallu myfyrio, dysgu, gwella’n barhaus ac arloesi
  4. rheoli anawsterau’n agored, yn foesegol ac yn ddewr
  5. gweithio’n effeithiol a chefnogol o fewn a rhwng gwahanol dimau
  6. gwella cydraddoldeb, cynhwysiant ac amrywiaeth a dileu rhwystrau’n bwrpasol
  7. cynorthwyo systemau a diwylliannau diogel, cyfranogol a dibynadwy.

Rydyn ni wedi datblygu’r egwyddorion hyn gydag Addysg a Gwella Iechyd Cymru (AaGIC).

Mae’r ffordd yma o weithio’n rhan hanfodol o iechyd a gofal cymdeithasol yng Nghymru.

Sut y mae arweinyddiaeth dosturiol yn arwain at ddiwylliant cadarnhaol?

Pan fyddwn yn arwain yn dosturiol, rydyn ni’n blaenoriaethu llesiant a datblygiad staff.

Mae hyn yn golygu bod y bobl a arweiniwn yn gweithio mewn diwylliant cynhwysol, effeithiol a phositif. Mae angen diwylliant cefnogol, cyfarwyddyd clir ac anogaeth ar staff, ynghyd ag ymrwymiad i ddeialog agored. 

Mae arwain gyda thosturi’n rhoi’r cyfarwyddyd ac anogaeth yma iddyn nhw. Mae’n helpu timau i deimlo eu bod o werth ac yn cael parch, er mwyn gallu gwneud eu gwaith gorau. 

Mae angen i arweinwyr tosturiol fod yn wydn a dewr ac maen nhw wedyn yn gallu rhoi hyder i’w timau.

Mae’r hyder yma’n golygu y gall timau:

  • weithio gyda’i gilydd tuag at amcanion cyffredin
  • dysgu o gamgymeriadau yn y gwaith
  • teimlo bod ganddyn nhw gymhelliad i wneud job dda
  • teimlo’n ddiogel a hyderus i gael trafodaethau agored er mwyn gallu mynegi eu teimladau, barn a syniadau heb ddal yn ôl
  • teimlo’n gyffyrddus yn codi pryderon a gwneud awgrymiadau er mwyn gwella pethau
  • cadw eu staff am hirach oherwydd eu bod yn hapusach
  • bod yn dosturiol tuag at bobl eraill.

Drwy wneud hyn, gallwn gefnogi pobl i fyw eu bywyd gorau drwy ofal a chymorth gwell.

Ble i gael gwybod mwy

Dyma rai dolenni at wybodaeth ac adnoddau i’ch helpu i ddeall mwy am arweinyddiaeth dosturiol a sut y gallwch arwain gyda thosturi.

Efallai na fydd rhai o'r dolenni hyn ar gael yn ddwyieithog neu mewn fformat hygyrch. Dydyn ni ddim yn gyfrifol am gynnwys a gynhyrchir gan sefydliadau eraill.

Egwyddorion arweinyddiaeth dosturiol a sut i'w defnyddio – Gofal Cymdeithasol Cymru
Yn egluro beth yw’r egwyddorion a sut i arwain yn dosturiol.

Pecyn diwylliant cadarnhaol ar gyfer gofal cymdeithasol i oedolion – Skills for Care
Pecyn i’ch helpu i wneud diwylliant eich gweithle’n amgylchedd cadarnhaol, tosturiol, cydweithredol a chynhwysol lle y mae pobl yn derbyn gofal a chymorth o ansawdd uchel.